Բուխարեստում կայացած ազատ ոճի ըմբշամարտի Եվրոպայի առաջնության ժամանակ իրեն լավագույն կողմերով դրսևորեց և, առաջին անգամ մեծահասկաների պայքարում հանդես գալով, բրոնզե մեդալ նվաճեց 61 կգ քաշային Մեժլում Մեժլումյանը։
Անկախի հետ զրույցում ազատ ոճի ըմբշամարտի Մ23 տարեկանների աշխարհի առաջնության բրոնզե, Մ23 տարեկանների Եվրոպայի առաջնության արծաթե մեդալակիր, Հայաստանի հնգակի չեմպիոն, այժմ արդեն Եվրոպայի մեծահասակների առաջնության բրոնզե մեդալակիր Մեժլում Մեժլումյանը կիսվում է տպավորություններով և, կարևորելով այս մեդալը, նշում, որ այն վստահություն հաղորդեց սեփական ուժերի նկատմամբ։
-Շնորհավորում ենք մեծահասկաների պայքարի մեկնարկում հաջողության հասնելու, պատվո հարթակի երրորդ աստիճանին կանգնելու կապակցությամբ։ Ինչպե՞ս էիք նախապատրաստվել ԵԱ-ին։
-Շնորհակալ եմ։ Եվրոպայի առաջնությանը նախպատրաստվելու համար 3 ուսումնամարզական հավաք ենք անցկացրել՝ գլխավորությամբ հավաքականի մարզիչներ Հաբեթնակ Կուրղինյանի (գլխավոր մարզիչ) և Էդգար Ենոքյանի (երկրորդ մարզիչ)։
Հատկապես իմ դեպքում շեշտը դրված էր 2023 թվականի մինչև 23 տարեկանների աշխարհի առաջնության ժամանակ թույլ տված թերությունների շտկման վրա։ Շատ լավ նախապատրաստական շրջան էինք անցել և մարտական տրմադրված մեկնեցի Բուխարեստ։
-Ձեր ելույթների, մրցակիցների մասին ի՞նչ կասեք։
-Մրցակիցներս փորձառու և ուժեղ մարզիկներ էին, նշեմ, որ ես շատ լավ մարզավիճակում էի, բայց քանի որ առաջին անգամ էի հանդես գալիս մեծահասակների պայքարում, ուստի այս անգամ փորձի պակաս նկատվեց։
-Ի՞նչ տվեց Ձեզ այս ձեռքբերումը, ի՞նչ է հարկավոր սպորտում հաջողության հասնելու համար։
-Այն շատ կարևոր էր, քանի որ նորից նշեմ, որ առաջին անգամ էի հանդես գալիս մեծահասակների պայքարում։ Ինձ տվեց մեծ փորձ և վստահություն սեփական ուժերի նկատմամբ։
Սպորտում հաջողության հասնելու համար հարկավոր է լսել և հավատալ մարզիչներին, հավատալ սեփական ուժերին, ջանք ու եռանդ չխնայել մարզումների ժամանակ և պահել շատ մեծ սպորտային կարգապահություն։
-Առաջիկա ծրագրերից կխոսե՞ք։
-Ուրախ եմ, որ կարողացա հաջող հանդես գալ մեծահասակաների ԵԱ-ում։ Առաջիկայում բավական լուրջ մրցաշարեր են լինելու, ջանք ու եռանդ չեմ խնայելու, որպեսզի հաջող ինձ դրսևորեմ և ավելի բարձր արդյունքներ գրանցեմ։
