Էստրոգենները և պրոգեստերոնները համարվում են կանացի երկու հիմնական հորմոնները: Ինչպես դրանց պակասը, այնպես էլ ավելցուկը կարող է հանգեցնել լուրջ հետևանքների, ասում են բժիշկները։
Էստրոգենների մասին
Գինեկոլոգները նշում են, որ էստրոգենները կանացի սեռական հիմնական հորմոններն են, դրանք նույնիսկ կարելի է անվանել ամբողջ հորմոնալ համակարգի «դիրիժորը»: Էստրոգենների խումբը ներառում է էստրոն, էստրիոլ և էստրադիոլ։ Դրանցից վերջինը համարվում է առաջատարը և որոշիչ դեր ունի հասուն կյանքում, ներառյալ երկրորդական սեռական հատկանիշների ձևավորումը և բարեհաջող հղիությունը։ Էստրոգենները վերահսկում են արգանդում էնդոմետրիումի աճը, ուստի դրանք կարող են նաև անվանվել աճի հորմոններ, ինչպես նաև կարգավորում են ոսկրերի ամրությունը, օգնում են պահպանել խոլեստերինի նորմալ մակարդակը և «վերահսկել» դաշտանային ցիկլը:
Եթե ինչ-ինչ պատճառներով օրգանիզմում էստրոգենի անհավասարակշռություն կա, դա կարող է մեծապես ազդել կնոջ առողջության վրա: Նրա ծավալի և՛ ավելացումը, և՛ նվազումը արգելակում է վերարտադրողական ֆունկցիան, վատ անդրադառնում արտաքին տեսքի, սրտանոթային համակարգի վիճակի, ոսկորների և աճառային կառուցվածքի վրա։
Էստրոգենի ավելցուկը, ցավոք, բավականին տարածված երևույթ է:
Հնարավոր պատճառներն են․
- սխալ ընտրված հորմոնալ փոխարինող թերապիան,
- ալկոհոլի չարաշահումը,
- ավելորդ քաշը,
- լյարդի ֆունկցիայի խանգարումները,
- անառողջ դիետան՝ շատ յուղոտ և բարձր կալորիականությամբ սնունդ,
- սննդակարգում վիտամին B-ի, ցինկի, մագնեզիումի, օմեգա-3 և 6 ճարպաթթուների պակաս,
- անոթային և սրտի հիվանդությունները, շաքարախտը, հիպերտոնիան,
- հորմոնալ հակաբեղմնավորիչ հաբերի անվերահսկելի օգտագործումը։
Ինչպես կռահել հորմոնների ավելցուկի մասին
Եթե ի հայտ են գալիս հետևյալ ախտանիշները, ապա դրանք կարող են ցույց տալ, որ ձեր օրգանիզմում չափազանց շատ էստրոգեն կա.
- փքվածություն,
- կաթնագեղձերի գերզգայունություն,
- լիբիդոյի նվազում,
- տարօրինակ ուռուցքներ կրծքավանդակում,
- դաշտանային ցիկլի խախտում,
- PMS/ նախադաշտանային համախտանիշի դրսևորում, չնայած դա նախկինում երբեք չի եղել,
- շարունակական գլխացավեր,
- տրամադրության հաճախակի փոփոխություններ,
- անհիմն տագնապայնություն,
- առանց նկատելի պատճառի քաշի ավելացում․ կանացի հորմոնների մակարդակի բարձրացմամբ ճարպային հյուսվածքը կուտակվում է հիմնականում գոտկատեղում, հետույքում և ազդրերում,
- մազաթափություն, եղունգների հետ կապված խնդիրներ,
- հիշողության հանկարծակի վատթարացում,
- ձեռքերի ու ոտքերի սառնություն,
- անքնություն։
Պրոգեստերոնի մասին
Այն կանանց մոտ, ովքեր ունեն էստրոգենի ավելցուկ, պրոգեստերոնը, ընդհակառակը, նվազում է, գրում է բրիտանական Express հրատարակությունը։ Սակայն երկրորդ կանացի հորմոնը ոչ մի կերպ չի զիջում էստրոգենին իր նշանակությամբ։ Պրոգեստերոնը բնական ստերոիդ հորմոն է, որը սինթեզվում է ձվարաններում, ամորձիներում, մակերիկամի կեղևում և հղիության ընթացքում՝ պլացենտայում:
Այսպիսով, պրոգեստերոնը պատասխանատու է վերարտադրողական համակարգի, կրծքագեղձի առողջության, արյան մեջ շաքարի կարգավորման, արյան ճնշման նորմալացման և ճարպի արտադրության համար: Այն նաև ազդում է ուղեղի կառուցվածքների վրա (հիպոթալամուս, հիպոֆիզի գեղձ) և անդրադառնում ճանաչողական գործընթացի, հիշողության, հույզերի, սեռական վարքի, մարմնի ջերմաստիճանի վրա։ Պրոգեստերոնը պաշտպանում է ոսկրային զանգվածի կորստից։
Եթե կինը պրոգեստերոնի պակաս ունի, նրա համար դժվար է հղիանալ, իսկ ընդհանուր առողջական վիճակը վատանում է։
Նշաններ, որոնք հուշում են հորմոնի ցածր մակարդակի մասին
Պրոգեստերոնի՝ նորմայից ցածր մակարդակի ախտանիշները.
- անկանոն դաշտան, որոշ կանանց մոտ այն ընդհանրապես անհետանում է;
- տրամադրության հանկարծակի փոփոխություններ;
- դեպրեսիա;
- գիշերային քրտնարտադրություն;
- չորություն և տհաճ զգացողություն սեռական օրգանների շրջանում;
- գլխացավեր, միգրեն։
Եթե նկատում եք վերը նշված ախտանիշները, այցելեք գինեկոլոգի կամ էնդոկրինոլոգի: Մասնագետը կնշանակի անհրաժեշտ ստուգումներ՝ խնդրի պատճառը պարզելու համար։
Ի դեպ
Շատերը թերագնահատում են հորմոնների նշանակությունը մեր կյանքում: Բայց ապարդյուն։ Նրանք կարող են բառացիորեն վերահսկել մեզ։ Ինչու՞ է ավելի լավ վեր կենալ, գնալ քնելու, ուտել և շատ այլ բաներ անել ժամանակացույցով: Օրգանիզմը որոշակի հորմոններ է արտադրում օրվա տարբեր ժամերին։ Իմանալով այդ ժամանակացույցը՝ դուք կարող եք ոչ միայն արդյունավետ օգտագործել ձեր ռեսուրսները, այլև բարելավել ձեր ինքնազգացողությունը, ասում է ՌԴ վաստակավոր բժիշկ Օքսանա Դրապկինան:
Աղբյուրը՝ https://doctorpiter.ru
